Комисијата за следење и оценка на исполнетост на условите за преминување во втора фаза од процесот на фискална децентрализација, ја одржа дванаесеттата седница на 17 февруари. Претставници на ЗЕЛС во оваа комисија се : Коце Трајановски, градоначалник на Град Скопје, Љупчо Којчиновски, градоначалник на Дебарца и Бесим Велиу, градоначалник на Зајас.

По усвојување на записникот се премина на втората точка од дневниот ред, која се состоеше од презентација на извештајот за евалуација на исполнетоста на условите на општините за преминување во втора фаза од процесот на фискална децентрализација, а врз основа на доставените квартални извештаи за периодот 1.10.2009 до 31.12.2009 година. Евалуацијата покажа дека четири општини ги исполнуваат условите а тоа се: Демир Капија, Другово, Кичево и Студеничани. Комисијата својата препорака ќе ја достави до Владата, која по усвојување на истиот, ќе треба да ги задолжи ресорните министерства за изготовка на блок дотациите за финансирање на децентрализираните надлежности.

Анализата покажа дека се уште постојат 4 општини, кои не го исполнуваат условот за прва фаза на фискална децентрализација. Затоа се задолжи ЗЕЛС и МЛС, да стапат во контакт со наведените општини и да им помогнат, или посредуваат во исполнување на критериумите.

Останатите општини пак, кои не можат да ги исполнат условите за влез во втора фаза, се соочуваат со проблем со блокираните сметки. Министерството за финансии веќе стапило во контакт со неколку од нив, со цел да им помогне со давање на позајмици, на една или повеќе години, согласно последните измени на Законот за финансирање на единиците на локалната самоуправа. Услов кој се бара од општините е да стапат во преговори со доверителите и да ги отпишат каматите на долговите, а при тоа да ги исполнуваат условите за добивање на позајмица.

Потоа комисијата ги разгледа и дотациите од ДДВ за 2010 година, кои се зголемени со 0,4% во однос на дотациите за 2009 година. Податоците покажуваат дека не постои општина која ќе добие под 4 милиони денари, на годишно ниво, што е поволно за руралните општини.

Резултатите од евалуацијата покажаа дека 12 општини не доставиле квартални извештаи, што е прекршок казнив согласно законот. ЗЕЛС треба да ги потсети сите свои членки, уште еднаш, да не ја забораваат оваа своја обврска.

На состанокот се спомна и Колективниот договор, согласно кој општините треба да го пресметаат и зголемувањето на платите на просветните работници, па се обрна внимание тој да биде земен во обзир.

Претставниците на ЗЕЛС, замолија на следниот состанок на Комисијата да се изготви и анализа на финансиските сретства, поединечно по општина, за остатокот кој се појавил на нивните конта на крајот на 2009 година, а се однесува на надлежноста образование.

Претставници на ЗЕЛС го поставија и прашањето за можност за краткорочни позајмици од Владата на општините, мислејќи притоа на општини кои се наоѓаат во втората фаза на фискална децентрализација. Одговорот од претставниците на министерство за финансии беше дека таква практика е согласно закон и дека општините кои имаат потреба од такви краткорочни позајмици за надминување на состојба на неликвидност треба да достават барање до министерството за финансии, а таму секој случај поединечно ќе се разгледува.